Written by Krishna Khanna Category: Kuch Kalam Se
Hits: 790

Hain zindagi se zid meri bhi,
Kuch sharte hain jeene ki.

Toot kar choor jo aina ho gaya,
Kuch nikhaar mujhme toh ho.

Har dard ki dawa mile,
Dawa na ho toh, dua toh ho.

Bikhare jo hai saathi mere,
Sametle unhe, aise kuch pal toh ho.

Hain bichdi jo palko se neend meri,
Neend na sahi, magar sukoon toh ho.

Sab kuch mila, fir bhi ek fakir hu main,
Sab kuch khokar paane ki aas toh ho.

Hain tamanna bas zindagi ke pal aise ho,
Jo ho humsafar mere, wo sang mere toh ho.

Hu baitha kashti mein sawaar, beech bhawaro ke,
Tar laga de us paar, toofaan kuch aise toh ho.

Hain chaukhath par kuch chirag jale huye,
Bhujne se pehle unme ek noor toh ho.

Tu patthar se khuda ho gaya,
Ek kankar saath mere toh ho.

Awaaz dheemi hi rahe,
Wajood me magar dum toh ho.

Daba hua hu kuch sapno ke bhoj tale,
Adhure sapne ho, magar haqeekat poori toh ho.

Ho ghanghor andhera har or,
Manzil ki raaho me kuch chamkte jugnu toh ho.

Ho aflatoon har jageh,
Sukoon ke alfaaz ho, jo kahe na ho sune na ho.

Garaj rahe ho baadal har or,
Is garaj ke sang kuch barsaat toh ho.

Ashq mein ho doobe, thak kar zindagi ke tewar se ho pareshaan,
Zindagi jeene ke liye ek maqsad toh ho.

Lamha koi bhi ho,
Har lamhe me jeene ka ek pal toh ho.

Ho jeb khaali beshaq,
Beshumaar iraade toh ho.

Kuch armaan aise bhi ho
Jo kabhi poore toh ho.

Yeh kaash, kaash kabhi sach toh ho.